Christianskirkjan er fyrsta stóra kirkjan í Norðurlondum, sum er bygd eftir fornum norrønum byggihátti. Takkonstruktiónin er tann sama sum í víkingahallunum, og soleiðis sum hon er varðveitt hjá okkum í teim gomlu roykstovunum og føroysku bygdarkirkjunum. Henda takkonstruktiónin vísir seg at vera sera væl egnað til kirkjubygningar. Vit hava her í kirkjuni betri akustikk enn í nakrari aðrari kirkju av somu stødd.

Kirkjan kostaði umleið tvær milliónir krónur at byggja. Meira enn helmingurin av hesum pengum er givin av Fonden til Fædrelandest Vel. Hin helmingin hevur kirkjuráðið fingið til vega. Christian kongur X var protektor fyri nevnda fond, og fekk tí kirkjan navnið Christianskirkjan. Hon er vígd minninum um teir føroysku sjómenninar, som lótu lív undir seinna heimsbardaga.

Kirkjan hevur umleið 1000 sitipláss, men tann dagin, tann 7. juli 1963, har Fríðrikur kongur saman við trúnarvinginum, prinsessu Margrethu, og prinsessunum Benediktu og Anne Mariu var hjástaddur, vóru nógv fleiri til staðar.